कांग्रेसका सभापति गगनकुमार थापाले पार्टीलाई नयाँ पुस्ताको नेतृत्वमा अघि बढाउन आवश्यक परे आगामी अधिवेशनबाट आफू नेतृत्व छाड्न तयार रहेको बताएका छन् ।

२५ भदौ, कंचनपुर । नेपाली कांग्रेसका सभापति गगनकुमार थापाले पार्टीलाई नयाँ पुस्ताको नेतृत्वमा अघि बढाउन आवश्यक परे आगामी अधिवेशनबाट आफू नेतृत्व छाड्न तयार रहेको बताएका छन् ।

उनले कांग्रेसभित्रको कमजोरी हटाएर फेरि जनताको भरोसा र लोकप्रियता हासिल गर्न आफूले नेतृत्व पनि छाड्न तयार रहेको बताएका हुन् ।

कांग्रेसका पूर्वउपप्रधानमन्त्री स्वर्गीय गोपालमान श्रेष्ठको ४५औं दिनको पुण्यतिथिमा बिहीबार स्याङ्जामा आयोजित शोकसभामा बोल्दै सभापति थापाले आगामी अधिवेशनबाट पार्टी नयाँ ढंगले जाने बताए ।

कांग्रेस बलियो बनाउन सबै एक ठाउँमा आउनुपर्ने बताउँदै उनले पार्टीको महत्व र अहिलेको अवस्थालाई गम्भीरतापूर्वक समीक्षा गर्नुपर्ने धारणा राखे ।

शासकीय अहंकारका कारण पटक–पटक व्यवस्था हल्लिने गरेको उल्लेख गर्दै उनले गत वर्ष भदौ २३ गतेको जेनजी आन्दोलनलाई पनि त्यसैको एउटा प्रारूपका रूपमा व्याख्या गरे ।

मतदाता कुनै पनि पार्टीको स्थायी नहुने बताउँदै सभापति थापाले समर्थक र शुभेच्छुकको संख्या घट्न नदिन कार्यशैली बदल्नुपर्ने बताए । चुनाव जित्ने र हार्ने विषयलाई मात्र केन्द्रमा राख्दा कांग्रेससँग समर्थक तथा शुभेच्छुक टाढिएको उनको टिप्पणी थियो ।

लेखकको बारेमा

eNajar

थप आर्टिकलहरु :

• कार्तिक १०, २०८३Blogदशौं लालझाडी कप मंसिर ३ देखि ११ सम्म, पुरुष विजेतालाई ३ लाख र महिला विजेतालाई ५० हजार
• कार्तिक ८, २०८३Blogएक महिलालाई तीन जनाले बलत्कार गरेर फरार
• कार्तिक ७, २०८३Blogबझाङमा भिरबाट लडेर वडाध्यक्षको मृत्यु
• अशोज ३०, २०८३Blogसुदूरपश्चिम प्रदेशमा बजेट कार्यान्वयन सुरु: कर्मचारीको खातामा तलब जान थाल्यो