राष्ट्रिय टोलीबाट कीर्तिमानी १३ गोल गरेका अञ्जनले पहिलो सिजन ललितपुर सिटी र दोस्रो सिजन झापा एफसीबाट खेलेका थिए । ‘म एफसी चितवनमा आबद्ध हुन पाउँदा उत्साही छु र एनएसएलको नयाँ सिजनलाई तयार छु,’ अञ्जनले चितवनको विज्ञप्तिमा भनेका छन्, ‘मेरो नयाँ टोलीका खेलाडीसँग सहकार्यको प्रतीक्षामा छु र क्लबलाई सफलता दिलाउन आतुर छु ।’

चितवनका अध्यक्ष सचिन ढकालले अञ्जनलाई अनुबन्धन गर्दा आफूहरू रोमाञ्चित भएको जनाउँदै भने, ‘उनको ट्र्याक रेकर्ड, व्यावसायिकता र समर्पण हाम्रा लागि बहुमूल्य हुने विश्वास लिएका छौं ।’ चितवनले यसअघि नवीन न्यौपानेलाई प्रशिक्षकमा नियुक्त गरिसकेको छ ।

सनिश र आदित्य ललितपुरमै

डिफेन्डिङ च्याम्पियन ललितपुर सिटी एफसीले सनिश श्रेष्ठ र आदित्य शाक्यलाई निरन्तरता दिएको छ । फागुन १० मा हुने एनएसएलको अक्सनअघि रिटेन गर्ने प्रावधान रहेको एनएसएल आयोजक नेपाल स्पोर्ट्स एन्ड इभेन्ट म्यानेजमेन्टले अघिल्लो दिन जनाएको थियो ।

नेपाली राष्ट्रिय टोलीबाट खेलिसकेका सनिशलाई ‘ए’ श्रेणी र आदित्यलाई ‘बी’ श्रेणीबाट रिटेन गरेको हो । ललितपुरले दुई वर्षअघि धनगढी सिटीलाई फाइनलमा ३–२ ले पराजित गर्दा आदित्य प्लेयर अफ द म्याच चुनिएका थिए ।