कञ्चनपुर। पुनर्वास नगरपालिका–८ मा रहेको जनजागरण सामुदायिक वन उपभोक्ता समूहले वनलाई पर्यापर्यटनको केन्द्रका रूपमा विकास गर्ने निर्णय गरेको छ। सामुदायिक वनको साधारण सभा र परिषद् बैठकबाट विभिन्न पर्यटन पूर्वाधार निर्माण गर्ने प्रस्ताव पारित भएसँगै योजना कार्यान्वयनको प्रक्रिया अघि बढाइएको हो।

साधारण सभा २०८२/०९/२८ र परिषद् बैठक २०८२/१०/०७ मा सम्पन्न भई वन क्षेत्रभित्र रहेका अधुरा तथा प्रस्तावित संरचनाहरू निर्माण सम्पन्न गर्ने निर्णय गरिएको समूहले जनाएको छ। उक्त निर्णयअनुसार सामुदायिक वनको ब्लक नम्बर ४ मा पर्ने तल्लो भू–भाग तथा सिँढी क्षेत्रलाई पर्यटकीय गन्तव्यका रूपमा विकास गरिनेछ।

पर्यटन प्रवर्द्धन तथा उपभोक्ताको आयआर्जन वृद्धिलाई लक्ष्य गरी तयार पारिएको योजनाअन्तर्गत स्विमिङ पुल, शौचालयसहित ड्रेस चेञ्जिङ रुम, इन्टरलक ब्लक बिछ्याउने, पार्कको पूर्व–पश्चिम गेट, ध्यान केन्द्र, बुद्ध पिस टावर, इकोहिम पार्क, बाल उद्यान, सामुदायिक भवन, गोलघर, वाटर फाउण्टेन, चमेनागृह, इन्डोर बोटानिकल पार्क तथा वाटर फरेसन लगायतका संरचना निर्माण गर्ने प्रस्ताव समावेश गरिएको छ।

सामुदायिक वन उपभोक्ता समूहले यी योजनाहरूलाई वन व्यवस्थापन कार्ययोजनामा समावेश गरी आवश्यक बजेटका लागि स्थानीय, प्रदेश तथा संघीय सरकारसँग समन्वय गर्ने निर्णयसमेत गरेको छ। तर, समयमै बजेट सुनिश्चित नभए उपभोक्ताहरूको इच्छाअनुसार निजी लगानीमा संरचना निर्माण गरी सञ्चालन गर्ने व्यवस्था पनि गरिएको छ।

उपभोक्ताको निजी लगानीमा निर्माण हुने संरचनाहरूको सञ्चालन सामुदायिक वन उपभोक्ता समूहको साधारण सभामा उपस्थित दुई तिहाइ सदस्यको बहुमतबाट पारित कार्यविधिअनुसार गरिने उल्लेख छ।

यसै सन्दर्भमा जनजागरण सामुदायिक वन उपभोक्ता समूहले कञ्चनपुर डिभिजन वन कार्यालय अन्तर्गत कुण्डावन सबडिभिजन कार्यालयमा ज्ञापन पत्र बुझाएको छ। ज्ञापन पत्र समूहका अध्यक्ष लोकबहादुर कार्की, सचिव लालप्रसाद घिमिरे, कोषाध्यक्ष हरिविक, पूर्व कोषाध्यक्ष शंकर केसी लगायत सदस्यहरू, बुद्धिजीवी तथा संस्थाका शुभचिन्तकहरूको टोलीले संयुक्त रूपमा बुझाएको हो।

ज्ञापन पत्र कुण्डावन सबडिभिजन कार्यालयका कार्यालय प्रमुख दिनेशकुमार यादवले बुझ्दै यस विषयमा आफूभन्दा माथिल्लो निकायसँग छलफल गरी पेश गर्ने बताएका छन्। साथै, नियमसंगत रुपमा के–कस्तो व्यवस्था मिल्छ भन्ने विषयमा आवश्यक बुझबुझारथ गरी सो कार्यालयलाई औपचारिक जानकारी गराइने उनले बताए।

स्थानीय स्तरमा पर्यटकीय गतिविधि बढाउने, रोजगारी सिर्जना गर्ने र सामुदायिक वनको दिगो उपयोग सुनिश्चित गर्ने उद्देश्यसहित अघि बढाइएको यो योजनालाई स्थानीयले महत्वपूर्ण पहलका रूपमा लिएका छन्।

लेखकको बारेमा

eNajar

थप आर्टिकलहरु :

• कार्तिक १०, २०८३Blogदशौं लालझाडी कप मंसिर ३ देखि ११ सम्म, पुरुष विजेतालाई ३ लाख र महिला विजेतालाई ५० हजार
• कार्तिक ८, २०८३Blogएक महिलालाई तीन जनाले बलत्कार गरेर फरार
• कार्तिक ७, २०८३Blogबझाङमा भिरबाट लडेर वडाध्यक्षको मृत्यु
• अशोज ३०, २०८३Blogसुदूरपश्चिम प्रदेशमा बजेट कार्यान्वयन सुरु: कर्मचारीको खातामा तलब जान थाल्यो