कञ्चनपुर चैत्र ३०। सशस्त्र प्रहरी बल नेपालले नेपाल-भारत सीमा निगरानीमा कडाइ गरेको छ।

गृहमन्त्री सुधन गुरुङले पदभार सम्हालेलगत्तै सीमा सुरक्षामा कडाइ गर्न निर्देशन दिएपछि सशस्त्र प्रहरीले सीमा क्षेत्रमा बढ्दो संवेदनशीलता र सुरक्षा चुनौतीलाई मध्यनजर गर्दै थप जनशक्ति परिचालन गरिरहेको हो।

सशस्त्र प्रहरी महानिरीक्षक राजु अर्यालले केही दिनअघि सुदूरपश्चिम प्रदेशको स्थलगत भ्रमण गरेपछि दिएको निर्देशनअनुसार अहिले कञ्चनपुर र कैलालीका सीमा क्षेत्रमा सुरक्षा सुदृढ गर्न थप जनशक्ति परिचालन गरिएको छ।

सशस्त्र प्रहरी बल नेपाल नम्बर ७ वैद्यनाथ बाहिनी मुख्यालय, अत्तरिया कैलालीले दुवै जिल्लामा नब्बे नब्बे जना गरी कुल १८० जना सशस्त्र प्रहरी थप गरिएको हो। वैद्यनाथ बाहिनीका निमित्त बाहिनीपति सशस्त्र वरिष्ठ प्रहरी उपरीक्षक दिग्विजय सुवेदीका अनुसार सीमा सुरक्षालाई प्रभावकारी बनाउन र अवैध गतिविधि नियन्त्रण गर्न अतिरिक्त जनशक्ति परिचालन गरिएको हो।

सीमा क्षेत्रमा निगरानी बढाउने, अवैध चोरी तस्करी नियन्त्रण गर्ने र समग्र सुरक्षा व्यवस्थालाई मजबुत बनाउने उद्देश्यले थप जनशक्ति परिचालन गरिएको हो, निमित्त बाहिनीपति सुवेदीले भन्नुभयो। साथै सम्भावित विपद् जोखिम क्षेत्रको अध्ययन तथा विश्लेषणसमेत गर्ने तयारी छ।

उहाँका अनुसार परिचालित जनशक्तिलाई तीस तीस जनाका तीन समूहमा विभाजन गरिएको छ। ती टोलीलाई एक दिन, एक रात र आकस्मिक अवस्थाका लागि पालैपालो तयारी अवस्थामा राखिने व्यवस्था मिलाइएको छ। कैलालीमा नम्बर ३४ गण र कञ्चनपुरमा नम्बर ३५ गण मार्फत ती टोली परिचालन गरिएको बाहिनीले जनाएको छ।

लेखकको बारेमा

eNajar

थप आर्टिकलहरु :

• भदौ २८, २०८३Blogट्रक पल्टिँदा चालकको मृत्यु
• भदौ २७, २०८३Blogसर्पले टोकेकी संगिताको मृत्यु, उपचारमा लापरबाही भएको परिवारको आरोप
• भदौ २७, २०८३Blogमोटरसाइकलको चक्कामा दुपट्टा बेरिँदा महिलाको मृत्यु
• भदौ २६, २०८३Blogभोटेकोशी बाढी प्रभावितका लागि दूरसञ्चार प्राधिकरणद्वारा १५ करोड सहयोग