प्रतियोगितामा थ्रीस्टार, मछिन्द्र, हिमालयन शेर्पा, संकटा क्लबसहित हनामी भरतपुर एफसी, झापा ११, जोङ्री एफसी सिक्किम र आयोजक कपिलवस्तु ११ ले प्रतिस्पर्धा गर्नेछन् ।

विजेताले ११ लाख ११ हजार १ सय ११ र उपविजेताले ५ लाख ५५ हजार ५ सय ५५ रुपैयाँ पुरस्कार पाउने छन् । अध्यक्ष थापाले फाइनलपछि डालोमा राखेर पुरस्कार दिइने बताए । उत्कृष्ट खेलाडीलाई ५० हजार, विधागत उत्कृष्ट खेलाडीले जनही ३० हजार र प्रत्येक खेलका म्यान अफ म्याचले १० हजार पाउनेछन् ।

गत वर्ष भरतपुरले उपाधि जितेको थियो । कपिलवस्तु र ऐतिहासिक गौतम बुद्धको जन्मस्थल तिलौराकोट र स्थानीय पर्यटकीय महत्वको क्षेत्रलाई प्रवर्द्धन गर्न र चिनाउन मदत पुग्ने विश्वाससहित आयोजना गरिएको आयोजकले जनाएको छ ।

प्रतियोगिताका लागि करिब १ करोड १८ लाख खर्च हुने आयोजकको अनुमान छ । गत वर्ष ७ लाख २५ हजार घाटामा गएको प्रतियोगिताबाट अझै ९ लाख उठ्न बाँकी रहेको अध्यक्ष थापाले बताए । बुद्ध रंगशालामा हुने प्रतियोगितामा प्रत्येक दिन ७ देखि १० हजार दर्शक आउने अनुमान छ । टिकटबाट १५ देखि २० लाख उठ्ने विश्वास अध्यक्ष थापाको छ । रंगशाला घेरेर अस्थायी प्यारापिट बनाउने आयोजकको तयारी छ ।

प्रतियोगिताको संरक्षकको रूपमा बाणगंगा, बुद्धभूमि, शिवराज, कपिलवस्तु, महाराजगन्ज र कृष्णनगर नगरपालिका, विजयनगर गाउँपालिका तथा प्रदेश खेलकुद परिषद लुम्बिनी रहेका छन् । लुम्बिनी प्रदेशले २० लाखभन्दा बढी सहयोग गर्ने लुम्बिनी प्रदेशका सांसद विष्णु पन्थीले बताए । उनले नगदको हिसाबमा यो लुम्बिनी प्रदेशको सबैभन्दा ठूलो प्रतियोगिता भएको दाबी गरे ।