कञ्चनपुरको बेलडाँडी गाउँपालिकाका उपाध्यक्षले प्रमुख प्रशासकीय अधिकृतमाथि कार्यकक्षमै दुर्व्यवहार गरेको घटनाप्रति कर्मचारीहरूले गम्भीर आपत्ति जनाएका छन्। आज फागुन १० गते उपाध्यक्षले प्रमुख प्रशासकीय अधिकृतको कार्यकक्षमा प्रवेश गरी अशिष्ट र अमर्यादित शब्द प्रयोग गर्दै गालीगलौज गरेको भन्दै गाउँपालिकाका कर्मचारीहरूले संयुक्त रूपमा प्रेस विज्ञप्ति जारी गरी सो कार्यको भर्त्सना गरेका हुन्।

विज्ञप्तिमा स्थानीय सरकार सञ्चालन ऐन २०७४ र सार्वजनिक प्रशासनको मर्यादा एवं आचारसंहिता विपरीत जनप्रतिनिधिबाटै यस्तो अशोभनीय व्यवहार हुनु अत्यन्त निन्दनीय र दुःखद रहेको उल्लेख गरिएको छ। यस्ता क्रियाकलापले जनप्रतिनिधि र कर्मचारीबीचको आपसी सम्मान, समन्वय र व्यावसायिक सम्बन्धमा गम्भीर असर पुर्‍याउनुका साथै कर्मचारीहरूको मनोबल गिराउने र संस्थागत छविमा आँच पुग्ने ठहर गरिएको छ।

विवादको कारण स्पष्ट नभए पनि कर्मचारीहरूले घटनाको निष्पक्ष छानबिन गरी सत्यतथ्य सार्वजनिक गर्न र दोषीमाथि कानुन बमोजिम आवश्यक स्पष्टीकरण सोधी कारबाही प्रक्रिया अगाडि बढाउन सम्बन्धित निकायसँग माग गरेका छन्। विज्ञप्ति मार्फत भविष्यमा यस्ता अमर्यादित र असहयोगपूर्ण व्यवहार नदोहोर्‍याउन तथा स्थानीय शासनका मूल्य-मान्यता र प्रशासनिक मर्यादाको सम्मान गर्न सबै जनप्रतिनिधि तथा सरोकारवाला पक्षलाई आग्रह गरिएको छ।

गाउँपालिकाको सुशासन, पारदर्शिता र प्रभावकारी सेवा प्रवाहप्रति आफूहरू प्रतिबद्ध रहेको स्पष्ट पार्दै कर्मचारीहरूले प्रशासनभित्र मर्यादित कार्यवातावरणको सुनिश्चितता हुनुपर्नेमा जोड दिएका छन्। यस विषयमा सत्यतथ्य बुझ्न र प्रतिक्रिया लिन बेलडाँडी गाउँपालिकाकी उपाध्यक्ष शान्ति नाथसँग सम्पर्क गर्न खोज्दा उहाँसँग सम्पर्क हुन सकेन।

लेखकको बारेमा

eNajar

थप आर्टिकलहरु :

• कार्तिक १९, २०८३Blogपुनर्वासको प्यारातालमा प्रथम बृहत् सांस्कृतिक महोत्सव २०८३ आयोजना हुँदै
• कार्तिक १६, २०८३Blogजनकपुरको दोस्रो जित, पोखराको लगातार दोस्रो हार
• कार्तिक १४, २०८३Blogसमाचार कक्षबाटै पत्रकार पक्राउ प्रकरणमा बोल्यो प्रेस काउन्सिल
• कार्तिक १४, २०८३Blog१६औँ रनिङ चाँदी कप फुटबलको उपाधि एपीएफ क्लब अत्तरियालाई, दोधारा चाँदनी उपविजेता