नवीन पार्की 

पुनर्वास ४ भदौ । नृत्यलाई मनोरञ्जनको माध्यममा मात्र सीमित नराखी फिटनेस, अनुशासन र आत्मविश्वाससँग जोडेर अघि बढिरहेका युवा कोरियोग्राफर सन्तोष अवस्थीले आफ्नो अभियानलाई कञ्चनपुरबाट बाजुरासम्म विस्तार गरेका छन्।
कञ्चनपुरको पुनर्वास नगरपालिका–स्थित आई.बी.आर.डीमा द फन्की डान्स एण्ड जुम्बा स्टुडियो सञ्चालन गर्दै आएका अवस्थीले बाजुराको सदरमुकाम मार्तडीमा आरडीएस डान्स एण्ड जुम्बा स्टुडियो सञ्चालनमा ल्याएका हुन्।
बडीमालिका नगरपालिका–९, तुफानडाँडा नजिकै हिमालय कैलाश होटलको तल्लो तलामा रहेको स्टुडियोको औपचारिक उद्घाटन बडीमालिका नगरपालिकाका नगरप्रमुख अमरबहादुर खड्काले गरेका छन्।
नयाँ स्टुडियोमार्फत बालबालिका, विद्यार्थी, युवायुवती तथा महिलालाई लक्षित गरी विभिन्न प्रकारका नृत्य तथा जुम्बा प्रशिक्षण सञ्चालन गर्ने तयारी गरिएको छ। स्थानीयस्तरमा रहेका प्रतिभालाई प्रशिक्षणको अवसर दिनुका साथै शारीरिक सक्रियता र सिर्जनात्मक गतिविधिलाई प्रोत्साहन गर्ने उद्देश्य स्टुडियोको रहेको बताइएको छ।
अवस्थीका लागि यो नयाँ सुरुवात मात्र नभई पुनर्वासबाट सुरु भएको उनको नृत्य तथा फिटनेस यात्रालाई अर्को जिल्लासम्म पुर्‍याउने महत्वपूर्ण चरणसमेत हो। उनले लामो समयदेखि नृत्य प्रशिक्षणसँगै जुम्बालाई फिटनेस र सक्रिय जीवनशैलीसँग जोडेर अघि बढाउँदै आएका छन्।
उनका अनुसार नृत्यले केवल मनोरञ्जन प्रदान गर्ने नभई शरीरलाई सक्रिय राख्ने, आत्मविश्वास बढाउने र आफ्नो प्रतिभा प्रस्तुत गर्ने अवसरसमेत दिन्छ। त्यस्तै, संगीत र नृत्यसँग व्यायामलाई जोड्ने जुम्बाले नियमित शारीरिक गतिविधितर्फ आकर्षित गर्न सहयोग गर्ने उनको बुझाइ छ।
पछिल्लो समय बालबालिका तथा युवापुस्ताको ठूलो समय मोबाइल, इन्टरनेट र सामाजिक सञ्जालमा बित्ने गरेको अवस्थामा उनीहरूलाई शारीरिक तथा सिर्जनात्मक गतिविधिमा जोड्नु आवश्यक रहेको अवस्थी बताउँछन्। यही सोचका साथ आरडीएसलाई नृत्य सिकाउने केन्द्रसँगै स्वस्थ र सक्रिय जीवनशैली प्रवर्द्धन गर्ने स्थानका रूपमा विकास गर्ने योजना रहेको छ।
मार्तडीमा डान्स तथा जुम्बा प्रशिक्षणको व्यवस्थित सुरुवातले स्थानीय बालबालिका तथा युवायुवतीमा रहेको प्रतिभालाई अवसर दिने अपेक्षा गरिएको छ। मनोरञ्जनसँगै फिटनेसलाई प्राथमिकता दिइने यस्ता गतिविधिले स्वास्थ्यप्रतिको चेतना बढाउनसमेत सहयोग पुग्ने विश्वास गरिएको छ।

स्टुडियो उद्घाटनका क्रममा नगरप्रमुख अमरबहादुर खड्काले प्रविधिको बढ्दो प्रयोगका बीच बालबालिका तथा युवालाई सिर्जनात्मक र शारीरिक गतिविधिमा जोड्नुपर्ने आवश्यकता रहेको बताएका छन्। उनले आरडीएसजस्ता पहलले स्थानीय युवापुस्तालाई सकारात्मक गतिविधितर्फ आकर्षित गर्न भूमिका खेल्ने विश्वास व्यक्त गरेका छन्।
पुनर्वासको आई.बी.आर.डीबाट सुरु भएको सन्तोष अवस्थीको नृत्य तथा फिटनेस अभियान अहिले बाजुराको मार्तडीसम्म पुगेको छ। नयाँ ठाउँ, नयाँ समुदाय र नयाँ पुस्तासँग जोडिँदै आरडीएसले नृत्य, संगीत र फिटनेसलाई एउटै माध्यमबाट अघि बढाउने लक्ष्य लिएको छ।
यसरी पुनर्वासबाट सुरु भएको अवस्थीको यात्रा बाजुरासम्म पुग्नु उनको व्यक्तिगत उपलब्धिसँगै नृत्य र फिटनेसलाई स्थानीयस्तरमा विस्तार गर्ने अभियानको नयाँ अध्यायका रूपमा देखिएको छ।

लेखकको बारेमा

eNajar

थप आर्टिकलहरु :

• कार्तिक १९, २०८३Blogपुनर्वासको प्यारातालमा प्रथम बृहत् सांस्कृतिक महोत्सव २०८३ आयोजना हुँदै
• कार्तिक १६, २०८३Blogजनकपुरको दोस्रो जित, पोखराको लगातार दोस्रो हार
• कार्तिक १४, २०८३Blogसमाचार कक्षबाटै पत्रकार पक्राउ प्रकरणमा बोल्यो प्रेस काउन्सिल
• कार्तिक १४, २०८३Blog१६औँ रनिङ चाँदी कप फुटबलको उपाधि एपीएफ क्लब अत्तरियालाई, दोधारा चाँदनी उपविजेता