कञ्चनपुर, पुनर्वास–२, मोतिबस्तीस्थित श्री सिद्धनाथ विद्या निकेतनको १६औँ वार्षिकोत्सव समारोह भव्य रूपमा सम्पन्न भएको छ।

विद्यालय प्राङ्गणमा आयोजित कार्यक्रममा विद्यार्थी, अभिभावक, शिक्षक तथा स्थानीय बुद्धिजीवीहरूको उल्लेख्य सहभागिता रहेको थियो।

कार्यक्रमका सभापति विद्यालय व्यवस्थापन समितिका अध्यक्ष विष्णुदत्त बडुले विद्यालयको शैक्षिक उन्नयनमा सबैको सहकार्य आवश्यक रहेको उल्लेख गर्दै आगामी दिनमा गुणस्तरीय शिक्षामा थप जोड दिने प्रतिबद्धता व्यक्त गर्नुभयो।

प्रमुख अतिथि शिक्षा अधिकृत भक्तबहादुर रोकायाले विद्यालयले शैक्षिक, अतिरिक्त क्रियाकलाप तथा अनुशासनको क्षेत्रमा हासिल गरेको उपलब्धिको प्रशंसा गर्दै विद्यार्थीहरूलाई समयको सदुपयोग गरी लक्ष्यप्राप्तितर्फ अग्रसर हुन आग्रह गर्नुभयो।

विशिष्ट अतिथि तथा संस्थापक यज्ञराज पन्तले विद्यालय स्थापना कालदेखिको यात्रा स्मरण गर्दै संस्थालाई यस स्थानसम्म पुर्‍याउन शिक्षक, अभिभावक र सहयोगी सबैप्रति आभार व्यक्त गर्नुभयो।

कार्यक्रममा सहायक प्रधानाध्यापक कृष्ण भुलले स्वागत मन्तव्य व्यक्त गर्दै भन्नुभयो, “विद्यार्थी भाइबहिनीहरू आजका विद्यार्थी भोलिका देशका कर्णधार हुन्। विद्यार्थीहरूको पठनपाठन, खेलकुद तथा शैक्षिक प्रगतिका गतिविधि देखेर विद्यालय परिवार अत्यन्तै हर्षित छ।

उद्घोषिका विद्यार्थी अस्मिता चन्द र अनुजा तामाङले कार्यक्रम सञ्चालन गरेका थिए। समारोहमा विभिन्न सांस्कृतिक प्रस्तुति, नृत्य, गीत तथा पुरस्कार वितरण कार्यक्रम समेत सम्पन्न गरिएको थियो।

कार्यक्रम उत्साह, उमंग र अनुशासित वातावरणका बीच सफलतापूर्वक सम्पन्न भएको विद्यालयले जनाएको छ।

लेखकको बारेमा

eNajar

थप आर्टिकलहरु :

• भदौ २८, २०८३Blogट्रक पल्टिँदा चालकको मृत्यु
• भदौ २७, २०८३Blogसर्पले टोकेकी संगिताको मृत्यु, उपचारमा लापरबाही भएको परिवारको आरोप
• भदौ २७, २०८३Blogमोटरसाइकलको चक्कामा दुपट्टा बेरिँदा महिलाको मृत्यु
• भदौ २६, २०८३Blogभोटेकोशी बाढी प्रभावितका लागि दूरसञ्चार प्राधिकरणद्वारा १५ करोड सहयोग